GJÖRFÍ haust 2014

Hér að neðan er dagskrá GJÖRFÍ, gönguhóps Jöklarannsóknafélagsins, haustið 2014. Gönguferðirnar eru á allra færi og eru að jafnaði farnar annan hvern þriðjudag kl. 18:00. Í forsvari fyrir hópnum eru Ástvaldur Guðmundsson, Jósef Hólmjárn og Þóra Karlsdóttir. Munið ennisljósin!

2. sep.      Dyradalir v. Hengil    Select Vesturlandsv.
16. sep.      Tröllafoss    Select Vesturlandsv.
30. sep.     Smalaholt Garðabæ/Kóp.    Gerðusafn Kóp.
14. okt.    Kópavogsdalur    Digraneskirkja.
28. okt.     Laugarnes    Sigurjónssafn
11. nóv.   Öskjuhlíð    Perlan
25. nóv.    Laugardalur    Áskirkja ?
9. des.    Umhverfis Varmá,    Mos. Álafoss
23. des.    Laugavegurinn     Hlemmur
6. jan.    Elliðaárdalur    Rafstöð
20. jan.    Kársnes,    Kóp Nesti, Fossv.
3. feb.    Vatnsmýri,     Tjörnin Askja


Sumarferð JÖRFÍ – Breytt ferðaáætlun

Annað árið í röð setur afar óhagstæð veðurspá sumarferðarplön JÖRFÍ í uppnám! Fyrirhugaðri ferð í Húsafell og á Okið verður því breytt og róið á önnur mið.

Veðurspá er hagstæðust fyrir Suðurland og því er stefnan tekin á Þórsmörk um helgina. Tjaldað verður í Básum á Goðalandi og farið í styttri skoðunarferðir um svæðið. Ekki er ákveðinn brottfarartími úr bænum en Vilhjálmur Kjartansson mun fara um kaffileytið á morgun, föstudag. Ef þeir sem ætla með í Þórsmörk senda okkur skeyti á: „sumarferd(hjá)gmail.com“, þá mun þeim upplýsingum komið áfram til Villa sem mun velja tjaldstæði sem rúmar sem flesta. Það er rétt að fram komi að félagsmenn Útivistar fá frítt í tjaldgistingu í Básum.

Áður auglýst skoðunarferð í ísgöngin á Langjökli fellur því einnig niður. Athugað verður hvort fara megi dagsferð í lok sumars til að skoða framkvæmdirnar sem í gangi eru á jöklinum. Frekari upplýsingar munu berast síðar.


Sumarferð JÖRFÍ

Minnt er á sumarferð Jöklarannsóknafélagsins helgina 4.-6. júlí nk. Ekið verður í tjaldstað í Reyðarfellsskógi í landi Húsafells að kvöldi föstudagsins. Að morgni laugardags verður raðað í bíla og ekið upp á Kaldadal. Gengið verður frá Kaldadalsvegi upp á Okið og er vegalengdin um 5 km með rólegri hækkun frá 700 m upp í um 1100 m hæð. Staðnæmst verður við Blávatn í toppgíg Oksins og athugaðar leifar Okjökulsins, sem nú er að hverfa. Síðan verður gengið norður af með útsýni yfir innstu byggðir Borgarfjarðar og neðstu tungur Hallmundarhrauns, auk þess sem Eiríksjökull og Langjökull munu blasa við ef vel viðrar. Komið verður í tjaldstað síðla dags og má áætla að gangan verði samtals 18 km. Um kvöldið verður slegið upp grillveislu í tjaldstað. Á sunnudeginum verður ekin fáfarin jeppaslóð til vesturs meðfram Reykjadalsá og ef tími vinnst til mætti einnig skoða nýja sýningu um Snorra Sturluson í Reykholti. Fararstjóri ferðarinnar verður Þorsteinn Þorsteinsson en Hálfdán Ágústsson aðstoðar við skráningu: í netfanginu sumarferd(hjá)gmail.com eða í síma 8659551. Frekari upplýsingar birtast hér á vefsíðu félagsins er nær dregur.

Myndin hér að neðan sýnir Oköxlina séða frá Reykholtsdal 1. júní sl. Rauðsgil er fyrir miðri mynd. Allmikill snjór er enn ofan við 500 m hæð og verður fylgst með leysingu á svæðinu á næstu vikum. Ekki er ástæða til að ætla annað en að áætluð gönguleið verði greiðfær orðin snemma í júlí, en líklegt er að ganga þurfi yfir skafla hér og hvar.

Oköxlin séð frá Reykholtsdal 1. júní 2014. Rauðsgil er fyrir miðri mynd.

Oköxlin séð frá Reykholtsdal 1. júní 2014. Rauðsgil er fyrir miðri mynd. Smellið á myndina til að stækka hana.


Vorfundur, nýtt fréttabréf og GJÖRFÍ-ferð felld niður

Vorfundur Jöklarannsóknafélagsins verður haldinn næstkomandi þriðjudag, 6. maí í Öskju. Á fundinum flytur Helgi Björnsson erindi um leit að týndum flugvélum á Grænlandsjökli og Sverrir Hilmarsson sýnir myndir frá Suðurskautslandinu. Nánar um fundinn í nýútkomnu fréttabréfi JÖRFÍ sem aðgengilegt er hér á vef félagsins: „Fréttabréf apríl 2014″.

Jafnframt bendum við á að fyrirhuguð GJÖRFÍ-ferð næstkomandi laugardag, 3. maí, fellur niður. Jafnframt hafa verið gerðar tvær breytingar á GJÖRFÍ-dagskrá sumarsins, 10. júní og 19. ágúst.


Vefmyndavél á Grímsfjall

Í byrjun vikunnar fóru að berast myndir úr vefmyndavél (http://vedur2.mogt.is/grimsfjall/webcam/index.php) á vesturgafli gamla skálans á Grímsfjalli en myndavélin horfir út yfir Grímsvötn. Björn Oddsson hefur átt veg og vanda af uppsetningu vélarinnar en að henni koma auk Jöklarannsóknafélagsins, Almannavarnadeild Ríkislögreglustjóra, Neyðarlínunnar og M&T ehf.

Svona var umhorfs á Grímsfjalli 31. mars 2014.

Fyrirhugað er að koma upp annarri vefmyndavél til viðbótar á Grímsfjalli en Vinir Vatnajökuls veittu myndarlegan styrk til kaupa á henni. Þá verða alls fjórar vel staðsettar vefmyndavélar í rekstri á Vatnajökli en þegar eru tvær vefmyndavélar í Kverkfjöllum (http://vedur2.mogt.is/kverkfjoll/webcam/) en Vinir Vatnajökuls styrktu kaup á þeim. Kverkfjallavélarnar eru enn huldar klakabrynju en myndir frá þeim munu berast að nýju er líða tekur betur á vorið.

Horft til norðvesturs frá Kverkfjöllum 29. ágúst 2013. Sandstormur er á aurum Dyngjujökuls.


Gönguskíðaferð GJÖRFÍ fellur niður

Fyrirhuguð gönguskíðaferð GJÖRFÍ á morgun, laugardaginn 14. mars, fellur niður.