Sumarferð JÖRFÍ 2.-4. júlí
28. júní 2010, 10:18 )Sumarferð Jöklarannsóknafélagsins verður farin í Þórsmörk 2.- 4.júlí. Skoðuð verða ummerkin um gosið við Fimmvörðuháls og í Eyjafjallajökli undir styrkri leiðsögn Jósefs Hólmjárn sem þekkir svæðið eins og lófann á sér.
Lagt verður af stað frá Select við Vesturlandsveg kl.19:00. Farið verður á eigin bílum og reynt að raða þeim sem ekki ráða yfir fararskjótum í laus sæti hjá öðrum. Samkvæmt upplýsingum frá Útivist er vegurinn í Þórsmörk í ágætu standi og fær venjulegum jeppum en talsvert vatn við Gígjökullinn.
Á laugardeginum verður gengið upp að nýju gígunum við Fimmvörðuháls. Gera má ráð fyrir að ferðin taki 6-8 tíma. Grillað saman um kvöldið. Á sunnudeginum verða skoðaðar breytingarnar sem orðið hafa við Gígjökulinn eftir gosið og hlaupin úr Eyjafjallajökli.
Gist verður í tjöldum í Strákagili en þar er prýðileg aðstaða. Þeir sem vilja vera í skála verða sjálfir að sjá um að panta gistingu hjá Útivist.
Nánari upplýsingar og skráning er hjá Ágústi Hálfdánssyni (894-5257) eða á sumarferd(hjá)gmail.com.
Mælt á Mýrdalsjökli
17. maí 2010, 10:10 )Uppstigningardagur var haldinn hátíðlegur á Mýrdalsjökli þegar vetrarákoma jökulsins var mæld. Myndarlegur hópur félaga JÖRFÍ hélt snemmdegis á jökulinn og boruðu þar þrjár afkomuholur jafnframt sem reynt var að leggja mat á öskudreifinguna á jöklinum frá gosinu í Eyjafjallajökli. Mikil aska var syðst á jöklinum en minnkaði heldur eftir því sem norðar dró en jökulinn var mjög ósléttur og ferðin sóttist seint. Að jafnaði mældist vetrarákoman um 20-30% minni en síðustu ár. Síðasti hluti hópsins var kominn aftur í bæinn eftir nær 20 klukkustunda ferð.
Hluti hópsins á Mýrdalsjökli (mynd: Hálfdán Ágústsson).
Á leid á jökul (mynd: Marius O. Jonassen)
Fréttabréf maí 2010
5. maí 2010, 00:12 )Eitthundraðastaogsautjánda fréttabréf Jöklarannsóknafélagsins hefur nú litið dagsins ljós og má nálgast hér.
Meðal efnis:
Eldgos í Eyjafjallajökli
Stækkun nýja-skála í Jökulheimum
Skipulagning slóða við Jökulheima
Sumarferð í Þórsmörk
Af aðalfundi í febrúar sl.
60 ára afmælishátíð JÖRFÍ á haustdögum
Mynd: MTG
Vorfundur JÖRFÍ 11. maí
4. maí 2010, 23:57 )
Mynd: MTG
Vorfundur Jöklarannsóknafélags Íslands verður haldinn þriðjudaginn 11.maí 2010 kl. 20 í sal 132 í Öskju, náttúrufræðahúsi Háskóla Íslands.
Sigrún Hreinsdóttir og Magnús Tumi Guðmundsson flytja erindi í máli og myndum um umbrotin í Eyjafjallajökli undanfarið.
Nánar um fundinn og félagsmál í nýútkomnu fréttabréfi sem má nálgast hér.
Ráðstefna til heiðurs Sigfúsi Johnsen jöklafræðingi
18. apríl 2010, 15:01 )Athygli er vakin á ráðstefnu til heiðurs Sigfúsi Johnsen jöklafræðingi sem haldin verður í lok ágúst næstkomandi í tilefni af 70 ára afmæli Sigfúsar. Áður var ráðgert að halda ráðstefnuna í lok apríl en henni frestað vegna áhrifa eldgoss í Eyjafjallajökli á samgöngur.
Sigfús Johnsen eðlis- og jöklafræðingur við Hafnarháskóla er einn af kunnustu vísindamönnum Íslendinga um þessar mundir. Hann hefur starfað að borunum og rannsóknum á ískjörnum úr Grænlandsjökli um 40 ára skeið og hafa þær skilað einstökum niðurstöðum um loftslagssögu Norðurhvels Jarðar sl. 125.000 ár.
Ráðstefnan er skipulögð í sameiningu af Háskóla Íslands, Kaupmannahafnarháskóla, Veðurstofu Íslands og Dansk-íslenska félaginu.
Helgi Björnsson hlýtur Íslensku bókmenntaverðlaunin
11. febrúar 2010, 02:09 )
Helgi Björnsson hlaut þann 10. febrúar Íslensku bókmenntaverðlaunin í flokki fræðibóka fyrir bók sína Jöklar á Íslandi.
Helgi er vel að verðlaununum komin enda bókin mikið og glæsilegt rit, byggt á áratuga rannsóknum Helga og samstarfsmanna hans við Háskóla Íslands og víðar. Í henni er lýst „jöklum þessa lands og sambúð þjóðarinnar við þá frá upphafi byggðar til okkar daga, hvernig jöklar hafa mótað landið og eytt. Bókin segir sögu þekkingaröflunar og skilnings á jöklum frá því fyrst var farið að rannsaka þá fram til nútímarannsókna. Rakin eru spor löngu horfinna jökulbreiða, hulunni svipt af landinu undir jöklum Íslands og greint frá líklegri framtíð þeirra,“ eins og segir í tilkynningu bókaútgáfunnar.
Myndefni er fjölbreytt enda Helgi ötull og snjall ljósmyndari en auk þess eru í bókinni fjöldi skýringarmynda, landakort, gervihnattarmyndir og þrívíð kort af landslagi undir jöklum sem nú birtast í fyrsta sinn almenningi á prenti.
Þeim sem ekki hafa landað eintaki af þessu merka riti er bent á að hafa samband við bókaútgáfuna Opnu, Skipholti 50b, s.578-9080, opna(hjá)opna.is
